A·dokni damgni medical college-rang chongmotan Shillong aro Tura Medical College-ko re·baenggipa 2026 bilsioni chalaigenok ine Health Minister Ampareen Lyngdoh, Chief Minister Conrad Sangma baksa tom·e chanchirimani ja·mano kobor ra·timgiparangna parakataha. Damgni medical college-rangko rika cho·anirango namen kamrangko ka·enga aro medical college-na bang·a rika cho·anirangko nangchongmotani gimin adita somoirangko nangkugen ine Lyngdoh aganangaha.
Medical college-rango kragipa doctor-rangko rimnapnagita, doctor-rangna tarigimin service rule-rangko taridapaniko nigrike kamko ka·na nangchongmota ine Lyngdoh aganangaha. Unbaksana a·dokni service rule-o doctor-rang sanna bannaniko dakan baksana doctorna poraienggipa chatro chatrirangna skie on·jolnaba niamo bilko on·a ine Lyndoh aganangaha.
Medical college-ko chalaina ma·mong sorkarini tarigimin model-ko a·dok sorkari che·eme niangenga jedakode teaching doctor, non-teacheng doctor, retirement-ni somoirang aro dingtang dingtang nanganirangni bidingo name dake nianiko dakangchengenga ine Lyngdoh janapangaha. Apsan daken rama jal·ang, ringani chi aro bijolirangni bidingo neng·nikanirangko man·enganiko, Chief Minister line department-rang baksa tom·e golpogrikanichi janapgimin neng·nikanirangko naljokatna man·angaha ine Lyngdoh aganangaha.
Una agreba ru·utgija somoini gisepon Health Minister an·tangan Uttar Pradesh-ona re·ange, uamangni medical college-ko chalaianio jakkalgipa modelko nambate u·ie ra·na ma·mong sorkarini dakchakanichi re·anggen ineba Lyngdoh parakangaha.
