Dengue sabisini giproroani ja·pangni bidingo a·jani manderangna ma·siatna aro mikkangchi ia sabisioni naljoke dongna man·agita, da·al salo National Dengue Day-ko South West Garo Hills-ni Chiringpara SSA RMSA Secondary School-o gisik ra·e maniangaha. Ia manianiona West Garo Hills-ni District Malaria Officer, Dr. B. Marak mongsonggipa ong·e sokbaaha. Una agreba T Marak, DSEO I/C, Dr. L. Marak, DMO I/C SWGH, M&HO I/C Betasing PHC, DPM, NHM, aro WGH-ni District Malaria Team-ba sokbae bakko ra·angaha.
Dengue sabisiko sanna samrang dongkujani gimin name dake naljoke dongna nanganiko Dr. B. Marak ia programo aganangan baksana ganggurangna mitchigipa chirango dongna aro bi·sa pe·atna cholko on·jachinagita rongtal an·talanirangko rakkichinaba didiangaha.
Dengue sabisiko ra·bitgipa ganggurangni bewalni gimin talataniko dakangan baksana bi·sarangko salni somoiomangba ia ganggurangoni naljokatna mosorirangko jakkalchina District Entomologist-ba dongpae didiangaha. Unbaksana DSEO I/C T. Marak, a·jao poraigipa bi·sarang komiani gimin poraia skiani gamchatani bidingo aganange mikkangchi ma·a paarangko uamangni de·drangko skulrango napate gisik nange poraiatchinaba didiangaha. Iako aganengon dengue sabisioni naljoke dongani cholrangni giminba songsul noksulrangona gipatchinaba aganangaha.
Ia programo dengue sabisini bidingo nambate ma·sie ra·ani cholko ra·baan baksana chatro chatrirangna quiz competition-koba ong·atangjolaha.
