South West Garo Hills, Ampati Multi Facility Centre-o, Skill Meghalaya-ni ning·o Hair & Beauty training program-ko Skill Development Office-nigita da·aloni a·bachengate on·angaha. Ia program-o a·jani ADC aro Project Director, RZ D. Shira, Ampati ni DRDA aro SRES, Ampati degree college-ni Principal Dr. MRM Willy, Skill Development Officer Tesilchi Sangma aro gipin dal·dalgipa manderangba dongpae bakko ra·angaha. Unbaksana bang·a namgniko man·asienggipa manderangba ia inauguration cum orientation program-ona re·bae bakko ra·angaha.
Ia training program-ko Garobadha aro Ampati-o donggipa skichakram centre-rango ong·atanggen. Iano skie on·aniko Skills Meghalaya baksa bakrime kam ka·enggipa M Paul dakdilanggen jeon hair & beauty ni a·bao sak 100 na bate manderangna skie on·a nisanko done tik ka·angaha.
ADC aro Project Director, RZ D. Shira, program-o aganengon, pilakkon ia koros nanggija skie ra·ani cholko gimaatjachina didiangaha. Hair & beauty industry-ni gamchataniko talatange, ian mingsa janggi tangao business-ko a·bachengna dakchakani ong·gen ineba ua aganangaha. Bilsi 20 na kingking kam ka·e u·i ma·sigipa M Paul, ia program-o manderangko gisik nange bakko ra·china didiange, Meghalaya State Skill Development Society baksa kam ka·e songsalna dangdike on·a skaniko ua parakangaha.
Skill Development Officer, Tesilchi Sangma, Skill Meghalaya ni miksonganirangko talatange, program-rangko ong·ate manderangna dingtang dingtang a·barango kamrangko ra·baaniko aganangaha. Ia training-ni ja·man bading chiwalani cholrangko ra·bana aro kamrangko tikatna ka·donganikoba Sangma aganangaha.
