Selsella-ni NGO jekai FKJGP, GSU, ADE aro ASWA dolrang apsan bakrime da∙al salni bako Selsella-ni Indoor Sports Hall-ko ta∙rakkale oprake on∙china Sports Minister Shakliar Warjri-na chitti see mol∙molangaha. Uamangni chittio janapatanigitade, ia Indoor Sports Hall-ni rika cho∙anirangko batanggimin 2009 bilsion matchotgenchimoba da∙ona kingkingba name dake oprake on·aniko dakujani gimin jakkalna cholko man∙kujaenga ine janapataha.
Ia Indoor Sports Hall-ko oprake on∙genchimode jolni kal·na gisiko nanggipa changgipa sapgipa chadamberangna, nambata gadango skie ra∙ani cholko on∙angan baksana saksa sakgipin baksa kal∙susaaniko dake be∙en bimangna an∙seng baljokanikoba ra∙baani ong·gen ine aganangaha. Ia Hall-o skie ra∙anirangko dakdilanichi chadamberangni kal∙susaani a∙bao tang∙doangna dakchakange mikkangchi state aro national level-ni kal∙susaanirango bakko ra∙nagitaba cholrangko man∙aba donga ineba janapangaha.
Indake ong∙engon Selsella-ni Indoor Sports Hall-ko ta∙rakkale oprake on∙anian a∙dok sorkarini songadam aro chadamberangko ra∙dona kam ka∙aniko mesokani ong∙gen ine bakrimgimin NGO dolrang aganangan baksana Sports Minister-ko nanggipa kamrangko nirokatpachina didiangaha.
