Da·al salni bako Garo Hills-o ge·sa mingsingbegipa skichakram Don Bosco College, Tura-o Degree-ko matchotangenggipa chatro chatri rangna “parting social” tom·bimonganiko college-nigita ong·atangaha.
Ia tom·bimonganiko college-ko wate re·angnasienggipa 6 gipa semester-ni chatro chatrirang jemangan da·o porikkarangko sea matchote chubatgipa gadangrango poraina ong·katangnasienggiparang baksa bon·kame watgrikaniko dakna ong·atangaha. Ia watgrikani programo college-o dongrikuenggipa chatro chatrirang mande ra·ani aro gisik ra·kamnagita chrokmesaaniko aro gitrangko ring·mesokangaha.
Apsan daken ia programni bako, Don Bosco College, Tura-ni Principal Fr. Bivan Rodrigues Mukhim-naba college-ni skigiparang aro chatro chatrirang “Farewell” ba college na dangdike on·ani bon·chotgipa salko maniangjolaha. Uni kam ka·ani bon·kamgipa salo aganengon, Don Bosco College, Tura-o bilsi 7 na Principal ong·e jako ra·e kam ka·ani somoio chatro chatrirangni porikkarango nambee chu·sokanirangko nikangan baksana college-o poraigipa chatro chatrirangni bang·dapanikoba niknagita man·angaha ine Fr. Bivan aganangaha. Unbaksana indita bilsina uni dangdike on·anio maming neng·nikani gri skigiparangni dakchakaniko man·ahanina aro chatro chatrirangni meli nangrime kamrangko ka·anina mittelpilani kattarangkoba aganangaha.
Una agreba Tura Don Bosco College-oni re·ange Salesian of Don Bosco (SDB), Guwahati Province-ni Vice Provincial ong·e kamko ka·angskagen ine Fr. Bivan aganangaha. Apsan daken uni Don Bosco College-o Principal ni kamko ka·anio chatro chatrirang baksa bilongen meli nangrime skie on·anina aro kamrangko ka·dilanio name didianinirangko on·ahanina uni indakgipa gunrangna bang·a chatro chatrirangan uamangni mittelpilskaaniko on·angtokaha.
