Skanggipa World War o France a·songchina A∙chikrangni gisepo dakgrikna re·anggipa matgrikrangko mande ra·e songe dongipa biapko nosto ong·ataniko knaani ja·mano Chief Minister Conrad Sangma a·damona re·ange nirokeaniko dake ia biapko taridapna gong 2 crore tangkarangko chamataha. Ia biapko chu ringgiparang rochakna jakkalanina aro jabolrangko kragija galaniko nike Turani bang·a manderang uamangni namnikgijaniko parakate sing·doanirangko dakangaha.
Social media rango giproroenggipa jajipjangrang aro jawilwatrangko nike Chief Minister, District Official rang baksa apsan ja·ku ga·na an·tangan ia biapona re·ange nirokena nangaona ga·akaha. Ua an·tangan nirokeaniko dakani ja·mano, ia biapko nosto ka·nagita ong·gija kamrangko ka·giparang donga ine aganangaha. Ia biapko nitoataina aro namdape tarina gong crore 2 mang tangkarangko chamatgen aro ia a·damko maming nosto ong·gija ripinge rakkiangen ine Sangma agandapangaha.
Ia biapko nina re·bagipa manderangna asongchakani aro gipin dingtangatanirangko dake taridapgen ine Sangma parakangaha. Ia biap namen gisik ra·na aro mande ra·na krabegipa ong·a jekon man·a dipet ripinge rakkina nanga ine Sangma agandapangaha.
