Ia a·gilsako janggi tanganio an·ching bimchipgipa aro tikkelgiparang ong·na nangchongmota, ia gunrang dongjagenchimode mande maming saloba chu·sokgipa ong·na amja. Ia chango SSLC aro HSSLC (Arts) porikkao Garo Hills-ni chadamberang ia gunko ja·rike gadang chikkinggipa biapo adita sak chatro chatrirang chu·sokgiparang ong·aha. Ian Garo Hills-na changsatai mikkim rasongko ra·baani aro gisik ra·na krabegipa sal ong·a.
Re·anggipa salrango HSSLC (Commerce aro Science) porikkao Garo Hills-ni skulrangoni Don Bosco college-oni chatro saksa kamkam gadang chikkingni ning·o chu·sokaiaha. Manderang ua somoio duk ong·an baksana ka·o nange social media-rango agananirangkoba nikangaha. Ia chango, SSLC porikkao bang·a Garo Hills-ni chadamberang name dakangaha, mongsongbate A·chik chadamberangni adita bimungrangko gadang chikkinggipao nikna man·aha. Ian an·chingni dakna amani aro chu·sokani bil gnangako mesoka.
SSLC porikkao Sherwood School, Tura-ni Anuj Chetry skanggipa gadangko man·aniara Garo Hills-ko skanggipaona ra·baaha. Bilsiantian Sherwood school Tura namgipa result-rangko ra·baronga, ia changoba skanggipa gadaongosan ong·aigija, sakgipin chatri Ayumi M. Sangma-ba dokgipa gadangko man·angaha.
St. Xavier’s Higher Secondary School, Tura-na ia chango Aime Azora G. Momin brigipa gadangko man·e school-na mikkim rasongko ra·baaha. St. Thomas Higher Secondary School, Mendipathar-ni Wanma Sangma brigipa gadangna Aime Azora G. Momin baksa apsan mark-rangko man·e apsan gadangko sualgrikangaha. Skugipa gadangko, Aeroville Higher Secondary School, Tura-ni Obadiah Namaan B. Sangma man∙e top 10 ni gadango chu∙sokgipa ong∙e Garo Hills-na mingnamgipa bimungko ra·baaha.
MBOSE HSSLC Arts stream ni porikkao skanggipa gadangkode St. Anthony’s Higher Secondary School, Shillong ni Menangmankhraw Kharkongor nambatgipa ong·e man·angaha. Indake ong·genchimoba gnigipa gadangko A·chikrangni giseop Don Bosco College, Tura ni Tanisha Das aro Salseng Marak gittamgipa gadangko man∙e top 10 list o chu∙sokgipa ong∙e Garo Hills-na mikkim rasongko ra∙baaha.
Ia bilsini SSLC porrikka result-ni pass percentage-ara 55.80% ong∙a jean re∙anggipa 2023 bilsini 51.93% na 3.87% mangnigita tang∙doaniko nikangaha. Apsan daken ia bilsini HSSLC Arts stream porikka result-ni pass percentage 79.76% ong∙a jean re∙anggipa bilsini 80.30% na adita komianiko nikangna man∙skaaha.
Da·alo A·chik chadamberangni gadang chikkinggipao dongpaaniko nike gisiko katchaaniko aro kusi ong·aniko man·angaha. Ian bang·a manderangni jattango ka·donggija agangipa kattarangna aganchakani ong·a. Pilak kamon jotton ka·gipa ong·genchimode aro man·a skani gisiko dongode chu·sokgipa ong·na man·a.
Indake namgipa gadangrangona sokdoe chu·sokaniara jatnasan mikkimko ra·baaigija gipin chadamberangnaba namgipa dakmesokaniko on·ani ong·a. Mikkangchi nambata gadangrangona sokdona a·gilsak baksa susagrikna skani aro bimchipaniko gisiko done apsan daken re·mikkangna nanggen.
Garo Hills-ni dal·roro silroroaniko nikna sikgiparang ong·ode chadamberangna ku·pattigipa aro dakchakgiparang ong·na nanga. Apsandaken chadambe chatro chatrirangba bimchipgiparang aro jotton ka·giparang ong·osa chu·sokgipa ong·na man·gen. Chadamberangan mikkangchi a·songko dilnasigiparang ong·a, uamangko tarisamsoanian dal·batgiparangni daito ong·a.
