Moheshkola-oni Kanai-ona National Highway-ko bariatna Balpakram-ni buringrangko den·pee rama tarina am·enganiko u·ina man·e A·chik State People’s Front (ASPF) dol raken jegalaniko dakataha.
Balpakram damsa ma·gitcham pagitchamrangni somoionin A·chikrangni bebe ra·e rakkibaenggipa ong·ani gimin sorkarini ia buringrangko nosto ong·ate rama tarina am·enganiko chanchipiltaichina ASPF dolrang didiataha. Sorkarini ia ja·kuko de·na miksonganiara A·chik jatni bebe ra·aniko mande ra·gijani ong·a ine ASPF dol parakataha.
Balpakramko ripinge rakkiangan baksana jatni bebe ra·aniko nosto ong·ataniona ra·bajachina aro sakantini namgnina nambata ja·kuko de·na skang songdongenggipa manderang baksa sorkari chanchirimchina ASPF dolrang aganangaha.
Iarangko manigija chasongni chasongna ripingenggipa Balpakramko nosto ong·atode raken jegalaniko dakanggen aro nie dongjawa ine uamang parakataha. Pilak songdongenggipa manderang aro A·chik jat sakantikon Balpakramko nisiatna am·enganina ku·rang on·china ASPF dolrang mol·molataha.
