A·chik NEHU Students Union (ANSU), Shillong Sukrobar salo election-ko ong·ate 2024-25 bilsina gitalgipa executive committee-ko seokangaha. Gital seokako man·gipa member-rangara Wegasal Sangma President, Griksal Sangma Vice-President, Amratha M. Sangma General Secretary, Praister Ch. Marak Asst. General Secretary ong·a jemangan jako ra·e union-ko jakkandile kamrangko ka·anggen.
Gital seokako man·gipa dilgiparang chatro chatrirangni namgnina, poraia skianiko tang·doatna aro campus-ni ning·o saksa sakgipin baksa meli nangrime dongani bidingo nambate niroke kam ka·na ka·dongsoenga ine parakataha. Uamangni dilanio chatro chatrirangni bilko jakkalanio jako on·pae, nanganirang aro neng·nikanirangko niroke kam ka·angna miksonge re·mikkanganggen ine u·iatangaha.
Dilgiparangni bilsi gimiko kamko ka·na kang·kare kae a·bachengengon uamang Shillong o poraienggipa chatro chatrirangni palo ku·rangko on·anggen aro university-ni ning·o namgipa dingatanganiko ra·bana kamrangko ka·anggen ine ANSU ni dilgiparang aganangaha.
