West Bengal-o Robibar attamoni Cyclone Remal a∙bachengbaanichi, Kolkata songjinma aro Bangladesh-ni bang∙a biaprango mikka balwa rakbeanichi da∙ona kingking sakgni manderang janggiko galna nangaona sokaha ine Bangladesh-ni Disaster Management Ministry parakataha.
Ia bilakbegipa balmanduri sokbaani a·selo a∙songni bang∙a salgro jolrango donggipa manderangko simsake dongchinaba a∙dok sorkarirangni State Disaster Management u∙iatangaha. Apsan daken Meghalaya a∙doko songdongenggipa manderangna dakna nanggni kamrangko ja·rike naljoke dongnagitaba ge∙etangaha.
Mikka balwa rakaniko nike, India Meteorological Department (IMD) May 27 tarikna a∙dokni East Khasi Hills, East Jaiñtia Hills, West Jaiñtia Hills, South West Khasi Hills aro West Khasi Hills a∙jarango ‘red alert’ ba mikka jimbeaniko nikna u∙isamsoaniko parakangaha. Unbaksana Garo Hills aro Ri-Bhoi jolgimikna orange alert-ko on∙ataha. IMD-ni parakatanigitade ia mikka balwa rakbeaniara 40-50 kmph mangnigita ta∙rakanio a∙dokona sokbagen jean 60 kmph-ni ta∙rakanionaba ong·naba niksamsoani gnang ineba u∙iatangaha.
Ia somoio a∙sel ong∙aoni naljoke dongna adita tarisamsoaniko dakchina a∙dokni manderangna u∙iatan baksana noktangtango dongchinaba ge∙etangaha.
