Tura a·brioni jokbaenggipa chiring chibisikni biaprangko aro A·kingni a·arangko sima ari tarina Tura ni MDC Bernard Marak, GHADC official-rang, Forest Department (Territorial), Danakgre, Boldorenggre aro Megonggreni A·king Nokmarang re·ange nirokeaniko dakangaha. Ia somoio uamang Gandrak Dare ni chibisikko nieaha jean Danakgre aro Megonggre ni A·king ning·o ga·aka.
Ia jolrango chotchanggija a·barangko o·e cha·anichi aro bola wa·arangko bang·e den·peanichi Gandrak Dare ni chibisik tipaona sokaha ine Bernard Marak parakataha. Gandrak Dareni chibisik biaprangko Meghalaya a·dok man·a skang GHADC nirokaha aro a·dokko man·a intal Forest department jako ra·sikaaha. Iani bidingo GHADC session o forest department na pakwataniko see jote rakkianiko sing·on mamingko mesokna man·jaha ine Marak parakataha. Unbaksana, Nokmarango aro GHADC o maming sing·a gri A·kingni a·arango krongrangko forest department songe donangaha ine Marak janapataha.
Tura jolni chibisikrang British rangni somoionin Assam Forest Regulation Act ni ning·o napja. Jakgitelni somoio Garo Hills ko constitution ni dongimin bilo Sixth Schedule ni ning·o napataha aro Assam a·dok bang·a department rangko GHADC na pakwatangaha. Meghalaya a·dokko GHADC dongani bilsi 20 ja·manosa man·aha aro bang·a cholrangchi dingtangate GHADC ni bang·bata department rangko a·kange ra·aha ine Marak parakataha. Bang·a chibisikrang aro department rangan GHADC ni ning·osa ong·a, a·dokni ning·o ga·akja ine Marak aganangaha.
Batanggimin bilsi 50 o bolrangko den·ani batroroaniko nirokna man·jaha aro bang·a chibisikrangan iani a·selo tipangengaha ine Marak parakataha. GHADC ia chibiksikrangko nirokna nanga, ian GHADC ni daito ga·aka. Garo Hills ko Sixth Schedule biap ine sorkari gualna nangja, uamangni kamrang sorkarini biaprangonasan ong·aia aro manigija napdrae kam ka·aniara a·brini manderangko naljokatna dongimin niamrangko pe·ani ong·a ine Marak aganangaha.
