West Bengal-oni a∙bachengbagipa Cyclone Remal, Robibar attamoni Bangladesh aro Northeast a∙dokrangona sokbae mikka jimbeani aro balwa ta·rakaniko chagrongangaha. Meghalaya a∙dokonaba ia bilakbegipa balmanduri balbae a∙ja gimikon bang∙a nisiataniko man∙angaha.
Ia a∙sel ong∙anio bang∙a bol wa∙arangni be∙aniko aro a∙arangni ruronganiko dingtang dingtang a∙jarango nikangna man∙aha. Indakgipa obostarangko chagronge manderangni nokjam, gari gorarang nosto ong·an baksana bijoli silitingrang chotanichi andalmindik dongna nangaonaba sokaha. State Disaster Management-nigita mikka balwa ta·rakanichi nisiata man∙gimin biaprangko taripiltaina kamrangko ka∙angenga.
Da∙o dipet ia cyclone ong∙anio Meghalaya a∙dokni East Jaintia Hills Sutunga jolo a∙arang ruronganichi mande saksa janggiko gimaataha aro saksni manderang namen saknaako man∙angaha ine u∙iatangaha.
