Da·al salni bako A·chik Conscious Holistically Integrated Krima (ACHIK) Purakashia Regional Unit Purakashia bajar aro wilwila jolrangko rongtalatangaha. Ia rongtalatanio jolni manderang sak 100 mangnigita bakko ra·angan baksana Block Development Officer (BDO), Sub-Inpector (SI), Primary Health Centre (PHC) ni Dr. Cara aro bajarni Secretary ba bakko ra·angaha.
Rongtalatani ja·mano songdongenggipa manderangna an·tangtangni wilwilako rongtal an·tale rakkichina BDO didiangaha. Apsan daken pilakkon rongtal an·tale donganian an·tangtangko an·seng baljoke rakkina dakchakani ong·a ine S.I aganangaha aro PHC ni Dr. Cara ba rongtal an·tale dongani gamchatani gimin aganangan baksana sakantikon wilwilako rongtalataniko dakchina didiangaha.
Bajarni secretary ACHIK dolrangni indakgipa ja·ku de·e kamko ka·anina mittelan baksana mikkangchi uamangna baksa bakrime kamko ka·angna aganangaha aro jolo dokan dakgiparangba mittelpilangaha.
Bon·kamao ACHIK dolrang rongtal an·talatanio bang·a jolo songdongenggiparangni bako ra·angtokani gimin ACHIK dolni ku·wattimgipa aro Assistant General Secretary Happynews R. Marak mittelpilskaani kattarangko aganan baksana rongtal an·talataniko dake mikkangchi an·seng baljoke aro nambata balwalrango janggi tangna man·agita re·mikkangna kang·kare ka·e pilakkon apsan bakrime kamko ka·angkuna mol·molangaha. Una agreba rongtal an·talaniko dake mikkangchi an·seng baljoke dongna aro songsalko rongtale rakkina man·agita kam ka·na ine jinmaan kang·kare ka·e ku·chakangtokaha.
