GSMC CEC Tura H.Q ni Asst. Environment Secretary Silbath A. Sangma Balpakram-ko Highway tarina am·enganiko raken jegalataha. Balpakram-ni hectare 2.5 a·ako sorkari rama tarianio jakkalna miksonganiara, A·chik a·songni damsa mingsingbegipa aro gamchatbegipa biapko nosto ka·na chanchianisan ong·aia ine Sangma janapataha.
Balpakram, ian A·chik mande sakantini bebe ra·anigita mande siahao uni janggi Balpakram-ona re·anga ine a·kanggipa ong·a. Ian A·chikrangni ma·sibaanio bang·a bebe ra·ani chinrangko mesoka aro indakgipa gamrangko maina sorkari nosto ka·na miksongenga ine Sangma sing·doangaha. A·chik jat ong·e indakgipa kamrangko ka·draaniko namnikjae aro rama tarianio sorkari Balpakram-ko nangatgija dingtang biapgita sorokko tarie on·a nanga ine Sangma mol·molanikoba dakangaha.
Balpakramgita National Highway-ko tarigenchimode mikkangchi Balpakram-ni bol wa·arangko skatang manderang rusie galgenok aro niamni a·palo badinganio ia National Park-ko nosto ka·aona ra·bagen ine jegalaniko dakataha.
Balpakramona dingtang dingtang biaprangoni songre songgabatgiparang bilsiantian re·bae nitogipa ong·telaigipa biapko nina hajalni hajal manderang sokbatokenga. Iasan ong·aigija Balpakramni gimin da’alo skul aro college-rango poraianiko dakenga ineba Sangma janapataha. Unbaksana da·alo Tura NEHU-ni aro gipin University-ni Research Scholar-rangba Balpakram National Park-ni gimin sandirikotanirangko dakenga ine Sangma aganangaha.
Ia pilako niate, sorkari ia ong·telaigipa nitobegipa aro A·chikrangni bebe ra·anio pangchakani donggipa biapko nosto ka·jachina GSMC CEC H.Q ni Asst. Environment Secretary Silbath A. Sangma mol·molangaha.
