Meghalaya aro Assam-ni sima ari sepango ong·gipa Amguri A·chik songo chalaienggipa Calvary Mission School-ni Director A·chik chatri sakgittamni kosako kragijagipa kamrangko ka·na am·aniko ma·sie A·dokgre ni GSU, Assam-ni ARSU, Dainadubi Rajasimla Youth Council aro gipin NGO rang bakrime dosi donggipa mandeko da·al salni bako bichal ka·angaha.
NGO rangni agananigitade, Calvary skulni Headmistress-ni segipa Kajal Uddin jean apsan skulon Director-ni kamko ka·enggipa, bilsi chu·ongkugijagipa chatri sakgittamko hostel-oniko an·tangni nokona okamate kragijagipa kamrangko ka·na am·aha ine u·iatangaha. Indake ia obostani bidingo chatri sakgittamo sing·sandianiko dakanichi ma·sina man·e dosi donggipa Director ni kosako kakket bichalko on·agita bakrimgimin NGO rang Adokgre Community Hall-o tom·angaha.
Uamang tom·e chanchirimani ja·mano dosi donggipa mandeni nokona re·ange uni namgijagipa kamrangni gimin jinmani mikkango bi·sarangni ma·a paa aro mahari ma·drango kema bi·ate indakgipa kamko ka·angtaijachina mikrakatan baksana mikkangchi indakgipa kamko ka·taiode raka sastiko on·gen ine lekka seate soi ka·atangaha.
