Akhil Bharatiya Vidyarthi Parishad (ABVP) Meghalaya me·chikrangoni skanggipa Director General of Police (DGP) ong·chenggipa Idashisha Nongrang-ko gronge chanchirimaniko dakangaha. Ia tom·anio State Secretary Tengku M. Marak baksana State Joint Secretary Bomsing Khongtir, NEC-ni member Promila Tham-ba dongpae bakko ra·angpaaha.
Ia tom·anio Meghalaya a·doko aro India a·songo ABVP-ni jako ra·e dingtang dingtang kamrangko aro namgnirangko ka·ani bidingo chanchirimangaha. ABVP jean a·gilsako dal·batgipa Student Organization ong·e kam ka·an baksana uamangni a·songo poraienggipa chadamberangko aro chatro chatrirangko ra·dona tikkele kamrangko ka·e a·songtangko chel·chakna jotton ka·e kamrangko ka·engani bidingo State Secretary Tengku M. Marak talatangaha.
ABVP-rangni miksonga gnang remikkange kamrangko ka·e Meghalaya Police Co-operation-ba jakko on·e mikkangchi poraienggipa chatro chatrirangko tang·doatna jotton ka·na Idashisha Nongrang aganangaha. Ia tom·anio mikkangchi poraienggipa chatro chatrirangko nambate nirok simsakangna aro ABVP-ni gamchatgipa kamrangko a·songo bariatnagitaba chanchiramangjolaha.
