Batanggimin somoio East Garo Hills, Rongribo Chibolgre-ni sak 48 VEC memberrangko kamoniko ra·galgipaoni sak 4 VEC member rangko master roll kamoni ma·ming u·iatagri ra·galani gimin Rongribo Chibolgre songni Dreambirth M. Sangma RTI ka·angaha. Uni RTI ka·anio sak 48 VEC memberrangko dingtang dingtang neng·nikani a·selo jekai mittamrangko gital nokdang dake jitanganina, kam ka·na sikjana, siang bon·anganina aro aadhar card dongjani gimin ra·galaha ine RTI na aganchakanio u·ina man·angaha.
Iani bidingo Samanda Block-ni daito donggipa officer-o sing·sandianiko dakon, VEC memberrangko kamoniko ra·galnagita VEC ni maming ja·ku de·anigri man·ja ine u·iatangaha. Iani gisepon Sangma ni gnigipa changna RTI ka·aniko dakon sak 48 ra·galako man·gipa VEC memberrangoni sak 4 kode maming u·iatani gri ba maming neng·nikani dongjagenchimoba ra·galaha ine niknagita man·aha. Ia ra·gala man·giparangoni uni pagipa aro jonggipani bimingba donga ine ua janapataha.
Unbaksana Sangma an·tangan VEC member-rangchi re·e sawa mancha soi ka·aha uarangko am·sandianio VEC memberrangko kamoniko ra·galani bidingo ma·siatgija bol ge·ani resolution ine agane uamangko VEC President aro Secretary-ni tarigimin resolution-o soi ka·draataniko Sangma parakataha. Apsan daken ra·galako man·gipa VEC memberrangona re·ange sing·sandianiko dakon uamang iani gimin mamingkoba ma·sirikja ine u·iatskaaha.
Sangma, uni skanggipa RTI ka·anio dingtang dingtang cholrangchi kamoni rikgalaniko aganchakanirangko man·ani kosakon gnigipa RTI ka·anioba apsandakgipa aganchakaniko man·e suk ong·jae iarangara RTI act ko jakkalsretani aro Public Information Officer-ni simsakgijani ong·a ine aganangaha.
