Da·al salni bako South Garo Hills Baghmara-ni Don Bosco Higher Secondary School-o District School and Education Officer “Science and Technology for the Society” ine katta bichongko done Science Exhibition-ko ong·atangaha. Ia exhibition-o Science aro Mathematics-ni gamchatani gimin aganangan baksana Science and Technology gri maming dakeba gitalgipa bosturangko bikotna man·jawachim maina science-nigita chanchigiparangsa pilak bosturangko tarina ba bikotna amgipa ong·a ine programo ku·pattigiparang aganangaha. Apsan daken jemangan Science subject-ko namnika uamangni namgipa chanchianirangchi namgnirangko ra·banagita man·a ineba aganangaha.
Ia chasong Science aro Technology-o janggitanggiparang ong·a maina an·ching pilakan da·ororo nokantion TV, mobile phone aro indakgipa dingtang dingtang bosturangko nikna man·enga ine sakgipin skigipa aganangskaaha. Unbaksana ge·a gamani a·baoba mesu bitchilrangko bang·bate ong·katate ge·gipa gamgiparangna tikatan baksana nambegipa cha·a ringanirangko on·a man·anikoba aganangaha. Apsan daken sanna bannani a·baoba Science aro Technology-ni dakchakanichi namnamgipa samrangko bikote mandeni janggiko jokatnagita dakchakan baksana indakgipa skie ra·ani cholrangko chatro chatrirangna on·aniara ong·gramaigija mikkangchi teng·sugipa ong·angen ineba ua aganangaha.
Ia Exhibition o bakko ra·giparangoni skanggipani biapo Don Bosco Higher Secondary School ni Iaishahbiangpor Jyrwa, gnigipao Mount Vale Secondary School ni Chandini G Momin aro gittamgipako United Baptist Secondary School ni Shiny Merikchi Marak man·angaha.
