Tura songjinmao, cycle salsuaani Cyclethon-ko Meghalaya Grassroots Music Project, Meghalayan Age Ltd aro Art Sourced bakrime June 2 tariko ong·atanggen. Ia susaanio skanggipana hajal 25, gnigipana hajal 15 aro gittamgipana hajal 10 tangkarangko on·angna tik ka·angaha.
Pilak bakko ra·na gisiko nanggiparang tangka gong 300 ko game an·tangtangni bimungko segate ra·na man·gen. Ia susaanio a·damo bimung segataniko ra·chakjawa ine u·iatangaha. Ia cycle salsusaaniko June 2 tarikni pring 5:30 bajio sokbatokna nanggen ine u·iatangaha aro chu·gimik km 16 ko salatanggen.
Unbaksana namgipa sports ni bewalko rakkie bakko ra·china, nanggipa gananirang jekai helmet aro jutarangko ganchinaba u·iatangaha. Iani bidingo talbate u·ina sikgenchimode 6009602007 number-ona ka·ate sing·atna man·gen.
