Remal Cyclone ni a·selo mikka balwa rakbee South Garo Hills a·jani Rajaronggat Rongpakgre songo bijoli salgipa siltong be·dape saknaa man·anggipa saksa me·chikma Merry Ch. Marak sorkarioni da·o dipet maming dakchakaniko man·kujaenga ine koborna parakataha. A·selo ga·akgipa ma·gipani jonggipani u·iatanigitade, South Garo Hills oni Tura Civil Hospital ona nambata sanna bannaniko ra·na watatani ja·mano porikka ra·e nion skoni adita ja·dilrang nosto ong·aniko ma·sina man·aha ine parakataha.
Tura Civil hospital o city scan ra·e nianio saknaa man·gipa ma·gipani skoo an·chirang topenga, cha·na ringna man·jaenga, pakre aro guasu dinggni be·an baksana rang·sitna neng·nikaniko man·enga ine ua parakataha. Nambata sanna bannaniko ra·na sikgenchimoba kangal cholgri ong·ani a·selo aro maming dakchakaniko man·jae neng·nikaniko chagrongenga ine ua agandapangaha.
Saknaa man·gipa ma·gipako West Garo Hills a·jani Jagdish Chelani re·bae nirok simsakaniko dakangahaoba maming sanna bannani bidingo dakachakaniko on·a agananga dongjaha ine ua parakataha. Ia mamlani bidingo uamang MeECL department na janapatoba da·o dipet maming ja·kuko de·a dongkuja ine u·iataha.
