Williamnagar songjinmako taridapanio jako ra·gipa contractor ramako taria matchotgija dontongataha jean songdongenggipa manderangna adita neng·nikanirangko on·enga ine A·chik Progressive Approach (APA) dolrang sing·doangaha. Songjinmani rama samsako tongkandi tarie samgipinko tarigija donanichi aro nalarangko taridapkujani a·sel mikka waani somoio ramarang a·kilokrara ong·engaha ine parakataha.
Songjinmani ramako ia bilsioni wachi karina skang mangmangsan a·bachengatachim jeon Petrol Pump donggipagita Kusimkolgre-oni MTC bus stand-ona rama namen re·na re·togipa ong·achim ine janapataha.
Unbaksana songjinmako taridapna mikkani a·selo dontongatenga ine pa·sikanide tol·gipasa ong·a maina a·doko mikka wana ruuta somoina skangan kam ka·aniko dontongmanaha ine APA ni President Francis Marak u·iatangaha. Una agreba saoba politics-nigita dontongatchina ge·eta ong·ode a·jani silroro namroroaniko kal·akanisa ong·enga ineba Marak aganangaha.
Indake a·dokni ba a·jani silroro namroroanina kamrangko ka·na chamatgiminrangko name jakkalgija ba jakkalsretgenchimode daito donggiparang nirokatna nangchongmota ineba Marak didiangaha.
