Da·al pringni bako P A Sangma Sports Complex-ni pakmarang re·anggipa bilsio be·gruagitan ia bilsiba mikkarang wana a·bachenga baksaan taria ru·utgija somoini gisepon pakmarang be·grutaianina, Tura-ni MDC Bernard Marak jakgitel ong·e am·sandianiko dakna on·china a·dok sorkariko didiangaha. Ia pakmani be·gruani a·selara nom·begipa a·mang gitchak ong·ani gisepon rika cho·anio bosturangko chu·ongagita jakkaljani a·sel ong·aha ine Marak janapanagaha.
Unbaksana re·anggipa bilsio pakmarang be·gruani ja·man contractor-ni kosako badi ka·genchimoba maming ja·ku de·anirangko dakjaha ineba Marak janpataha. Indake changni chang obostaona sokengani gisepon contractor-ni kamrangko namgija ka·aniara jolo songdongenggipa manderangna kenbegni ong·an baksana janggirangko gimaatna nangaona soknaba donga ine Marak aganangaha.
P A Sangma Sports Complex-o kam ka·anirangko nirokan baksana contractor-ni kosako am·sandianiko dake nanggipa ja·kurangko de·china Marak didiataha. Una agreba iani bidingo da·o gitalgipa ma·mong sorkariko rikani ja·man ua ja·ku de·e kamko ka·anggen ineba aganangaha.
