Meghalaya a·dokko man·aoni bilsi 50 ong·pile da·onan ja·rikbaenggipa Reservation Policy-ko maming dakeba dingtangatjachina A·chik Holistic Awakening Movement (AHAM) dolrang expert committee-ni Secretary L K Diengdoh chitti sedoangaha. A·dokni manderangni namgnina aro jat ge·gittamni gisepo chong·motan Khasi-Jaintiana 40%, Garo-rangna 40% aro bangkiko Other Scheduled tribe aro non tribal-rangna darangkoba mikkang nitegija apsan cholrangko man·agita gitcham dilgiparangni tik ka·gimin job reservation policy-ko expert committee-rangko songe nipiltaianiko dake dingtangatna am·enganiko jegalataha.
Unbaksana expert committee-rangni batanggimin somoio ia policy ko nipiltaie dingtangatna bako ong·gipa manderangni chanchiani aro ku·pattianirangko nichengesa kamko ka·na parakataniko bidingoba aganangaha. January 12 1972 bilsio tik ka·gimingita A·chikrangna kamo rimnapna 40% a·kanggiminko da·o nipiltaie dingtangataniara jatni gisepo aro songsalo kajia golmalko ra·baanisa ong·gen ine AHAM dolrang janapataha.
Apsan daken Meghalaya a·dok ong·bachengaoni gitcham dilgiparangni a·dokni jatantina mikkang nitegija apsan ong·e a·dokni chu·gimik tang·doanina tik ka·gimin reservation policy-ko dingtangatjachina didiangaha.
