Re·angipa sonibar walo mikka jimbee waanichi P A Sangma stadium-ni pakmarang be·wake nok nosto ong·a man·gipa nokdangna gong lakh 1.3 tangkarangko on·e dakchakna miksonganiko DC Jagdish Chelani parakataha. Pakmarangni be·gruani a·selko mikka jimbee wae chi skonge nalarang dongjani a·sel ong·aha ine u·ina man·angaha. Ia stadium-ko rikenggiparangni agananigitade kamrangko ka·kuengani gimin nalarangko tarina man·kujaenga ine parakatskaaha.
Ia be·wakgipa pakmarangko batanggimin salrango ia biapo niamgri dongchakenggipa manderangko a·rikalani ja·mano champengnagita dikdiksana tarigipasa ong·a ine DC parakataha. Stadium-ni bakrango mamingba nosto ong·anirang dongja, aro ia a·selni bidingo chu·gimik parakataniko sengkuenga ine DC agandapangaha.
Ia stadium-ko rikna crore 172 tangkarangna chamatgimin kam ong·a. Re·angimin bilsioba apsan daken football kal·chakram sepangni pakma be·wakaha aro bang·a manderangan stadium-ko rikna jako ra·enggipa company-ko dosi galangtokaha.
