Dadenggre jolni Non-Government L.P skulo skigiparang ni D.A arrear aro ad-hoc M.E school ni skigiparangna dormaharangko March aro April janiko on∙kujani gimin A∙chik Students’ Welfare Association (ASWA) Western Administrative Board Dadenggre, School Education and Literacy-ni Director Swapnil Tembe-na nirokatchina chitti sedoataha.
Skigiparangna dormaha aro D.A arrear-ko on∙kujani a∙sel skigiparangni neng·nikaniko nike, maming jejrengagri kamtangko ka∙na man∙agita uamangni man∙a nanggni tangka paisarangko ta·rake on∙pachina janapataha. Iani gisepon batanggimin May jani 7 tariko Sub-Divisional Education Officer (SDEO) na chittio parakatanigitade D.A arrear na gong 37,58,519 tangkarangko watatmanaha ine parakatmanahaoba skigiparang an∙tangtangni man∙a nanggniko da∙onamangba man∙kujaengani gimin ta·rakkale nirokatpachina didiangan baksana somoigita tangka paisarangko sokatchina ASWA dolrang mol·molataha.
