Durama Wagegitok Secondary School ko matchotgija rike donani gimin Nokrek Area Development Committee, Baghmara, South Garo Hills ni Inspector of School P M Sangma, J.E EDUACTION DEPARTMENT aro Amongpara ni MDC Nehru D Sangma da·al salo nirokeaniko dakangaha. Uamangni nirokeanio ia RMSA ni rika cho·anirang aro slab annanirang da·ona kingkingba matchotgijaniko nikangaha ine uamang u·iatangaha.
Koborrangko man·soanigitade re·anggipa March 19 tariko ia Durama Wagegitok Secondary School ni rika cho·ani bidingo Nokrek Area Development Committee Education Department-o RTI ka·doangaha jenan April 23 tariko uamangna aganchakaniko on·ataha. Uamangni RTI ka·anio ia skul building ko rikna 2021 bilsini December 13 tariko Tura RC Road ni Sengrak D Sangma na jako ra·e kam ka·na on·aha ine u·ina man·aha aro work order o janapanigitade work order man·ani saloni ja 12 ni gisepon kamrangko matchotatna nanganikoba parakatan baksana kamna chamatgimin tangka ara gong 1,11,17,000 ine u·iatangaha.
Education Department ni RTI o aganachakatanigitade ia buildingko rikani 45% mangni kamrang matchotaha ine janapataha, indiomangba a·gitalo 30% ni kamrangsan matchotkuenga ine nikna man·aha. Iako buildingko rikna re·anggipa 2022 bilsini August jao a·bachengataha aro 2023 September oni da·ona kingking jean ja 9 na mancha kamrangko ka·gija donaha ineba parakataha. RTI o janapatanigita ia skul building gadang gnini ong·a jeon ge 13 kutturirang, me·asa rangna toilet ge 4 aro me·chik rangnaba toilet ge 4 dake rikani chol donga.
Ua jolni ge 12 songrango ian ge·sa kamkam secondary skul ong·ani gimin chatro chatrirang aro skigiparang ia skul building ko matchotgija galchipani a·selo bilonggen neng·nikaniko man·enga ine parakataha. Chatro chatrirangna bida ko skie on·a kutturi ge 2 mangmango skigiparang skie on·a nangan baksana toilet rangko da·onaba rike on·kuja ineba aganangaha.
Uamangni da·alo nirokeaniko dakani somoio contractor Sengrak D Sangma biap ona an·tang re·bagija Sub-Contract ong·e ka·gipa Jemson Ch Sangma ko watatskaaha jeon ua ia skul ni rika cho·anirangko ta·raken matchotatna ku·chakangaha ine koborna parakataha.
