Da·al salni bako Jongkol songni Kongkona Government Lower Primary Skul nokko Southern Zone-ni AHAM dolrang re·ange nirokeaniko dakangaha. Uamangni nirokeanio skul nokni namjabeahani aro taridapna nanganirangko bang·en nikangaha ine parakataha.
Ia LP skulni nokkingrang namjabee napongani a·selo sal rakani ba mikka waani somoirango poraienggipa chatro chatrirangna aro skigiparangna namen neng·nikaniko on·enga ine u·iatangaha. Unbaksana skul nokni obostako nike salantio skul-ona re∙bagipa chatro chatrirangna aro skigiparangna namen kenchakbeaniba ong·enga ine AHAM dolrang aganangaha.
Indake namgijagipa obostarangona sokpiloba ia skul-ko taridapnagita sorkarioni maming dakchakaniko man·jae skul-ko chalaienggipa aro songdongenggipa manderang namen neng·nikaniko man·enga ine janapataha. Ia obostarangko daito donggiparang nirokate ta·raken taridape on·taipilchinagita ma·gipa pagiparang, skigiparang aro AHAM dolrang mol·molangaha.
