Siju Regional Unit-ni AHAM dolrang Siju-oni Rongsu-ona namgipa rama dongjani a·selo songdongenggipa manderangni neng·nikanirangko chagrongenganiko nirokatchina Chief Minister Conrad Sangma-na chitti sedoataha.
Ia ramako tarigija galchipe donani a·selo salantio re·rurae kamrangko ka·e cha·enggipa manderangna neng·nikanirangko on·an baksana bading chiwalaniko dakanioba tang·dona man·jaenga ine AHAM dolrang aganangaha. Ia jolrango Meghalaya a·dokko man·chengaoni da·ona kingkingba nanggipa rika cho·ani kamrang dongkujaenga ine uamang janapataha.
Siju damsa mingsinggipa aro a·dokna mikkim rasongko ra·bagipa biap ong·an baksana Captain Williamson A. Sangma-ni atchiram songba ong·a. Ia ramarangko tarigija galchipe donanichi jolo songdongenggipa manderangna neng·nikanirangko on·enganina adita namdapatna nanganirangko AHAM dolrang janapangaha. Ramarang namjanichi wachi karirango manderangna neng·nikaniko man·enga aro a·sel ong·aoni maming naljokanirangba dongja ine uamang parakataha.
Ia neng·nikanirangko janapate, galchipgipa ramako tarie on·china aro altuae ga·batna man·agita Simsang chibimako RCC dolong kae on·chinaba AHAM janapataha. Unbaksana, songni manderang baksa agangolpogrike name nirok sandichenge miksongani gnang kamrangko ka·china, chu·ongagita tangka paisarangko chamatchina aro somoigita matchotatchina AHAM dolrang didiataha.
