India aro Bangladesh-ni gisepo bading chiwalanio gue gran, chinirangko salenganina aro niamni a·palo NH-62 ramao tangkarangko gilenganiko dontongatchina dabianiko A·chik Conscious Holistically Integrated Krima (ACHIK) Rongmil Unit, EGH-ni DC-na lekka see on·angaha.
Niamni a·palo Banglasdesh-oniko Assam a·dokona gue granrangko garini gari salenganiara re·anggipa bilsini August jaonin niknagita man·enga. Ia gue granrangko nanggipa lekka pancharang donggija salenga ine u·iatangaha. Indake niamni a·palo gue granrangko badinganiara Garo Hills-o gueni damrangko tang·onataona sokatan baksana bang·a game ge·e cha·enggipa manderangni janggi tanganiko neng·nikaniona ra·baaniba ong·enga ineba janapataha.
Apsan daken Assam a·dokoniko Bangladesh a·songona NH-62 ramagita chinirangko badinganirangkoba salantian nikna man·enga. Iako aganengon ramarango bang·a checkpoint-rang donggenchimoba maidake salantio truck-rango chinirangko salna man·enga ine sing·doangaha. Indake nangana bate chinirangko gipin a·songona salaniara chinirangni damko tang·doatasan ong·aigija mikkangchi chu·onggijanirangko chagrongna kenchaksoaniba ong·enga ineba ACHIK dol u·iatangaha.
Una agreba game cha·giparangni bosturangko komia damo ra·ani gisepon game ge·e man·giminrangko badingna salenggiparangoniko NH-62 ramarango skatang niamgri tangkarangko gilanikoba nirokatchinagita mol·molataha. Indake game cha·giparangoniko niamgri tangkarangko drae ra·anichi salantio bading chiwale cha·enggiparangna sinjetaniko on·ani ong·a ineba janapataha.
Ia pilak niamni a·palo kamrangko ka·enganiko ta·raken dontongatnagita, NH-62 ramani checkpoint-rango nambate nirikkianirangko dakatchina aro law enforcement agency-rang baksa bakrime nirok simsakanirangko dakangchina ACHIK Rongmil Unit EGH-ni DC-ko didiangaha.
