Williamnagar Loyola College-ni Principal Fr. Stephen Athikho SJ, college-o skigiparangni kosako kragija kamko dakna jotton ka∙anina Eastern Zone, Williamnagar-ni Garo Students’ Union (GSU) dolrang raken jagalataha.
GSU dolni u∙iatanigitade mijal salni bako Loyola College Economics aro Garo department-ni skigiparangna sanction post-ko nangjawa ine Principal an∙tangan chittiko see skigiparangko soi ka∙china draatangaha. Principal-ni draatako man·genchimoba skigiparang uni segipa chittio soiko ka·jaha aro ia kamko college-o ka·enggipa sakanti skigiparang bakrime jegalangaha.
Ia kamko ka∙anira India-ni Constitution, Article 21 jean Right to Life aro Personal Liberty-ko niam pe∙ani ong∙an baksana mandeni Right to Privacy-ko ra∙sekani ong·a. Indake dakanichi Indian Penal Code (IPC) ni Section 499 & 500-o pangchake mandeni kosako kragija kamko ka∙ani ong∙a ine GSU dolrang aganangaha. Ia kragija kamko ka·gipa Principal-ni kosako daito donggipa dilgiparang raka ja∙kuko de∙na nanga aro dosi dakgipa mande kemako bi·na nanga ine GSU dolrang dabiangaha.
Ge·sa niksenggipa Williamnagar Loyola College-ni Principal saksa ong·e, indake kragija kal·akna am·aniara cha·ugipagita daksrukani aro sanction post-ko donnue parakgija kam ka·ani ong·a ine GSU dol parakataha. Ian manderangna jajaaniko ra∙baan baksana daito donggiparangni kosako sing·doani ong∙a ineba uamang janapangaha.
Loyola College a∙doko gesa niksenggipa bidani a·dam ong∙enggon recruitment policy-ni bidingo a∙dokni manderangna aro Garo Hills-na parakna nanga. Mikkangchi indakgipa kamrangko donnue ka∙genchimode dilgiparangni kosako NGO-rang, skigiparang aro jolo songdongenggiparang nanga ja∙kurangko de∙e kang·kare kae re·mikkanganggen ine mikrakataniko on·ataha.
