Mijal salni bako National Common Entrance Test (NCET) porikkako ong∙atna tik ka∙aniko tanggitik dontongatna nangao ga∙akaha. NCET porikkako tanggitik dontongatna nangani a∙selara adita technical-nigita neng·nikanirangko man∙e dontongatna nangao ga∙akaha ine North Eastern Hill University (NEHU) Centre-ni NTA, Nodal Officer parakataha.
Porikkako 2 bajioni 5 bajiona ong·atnagita tik ka∙angani gisepon Shillong NEHU-o adita neng·nikanirangko man∙e kontagni ja·manchake 4 bajio ra∙na tik ka∙e chatro chatrirangni porikka sechakramo nape seengmitingo somoio kontasani ja·man tanggitik dontongatangaha. Ia porikkako dontongatanio chel·a biaponi sena re∙bagipa chatro chatrirang bang·a neng·nikanirangko chagronge suk ong·gija agananikoba knaangna man·aha.
NCET porikkako senagita a∙song gimiko sak 40,233 mang bimingrangko segataha jeon Meghalaya a∙dokni sak 210 mang porikkako sengiparang gnangchim. Ia porikkako ra∙anio Meghalaya a∙dokosan ong∙aigija a∙songni bang·a biaprangon technical-nigita neng·nikani a∙selo dontongatna nangao ga∙akaha.
Indake ong·engon NCET porikkako ong·ataiani tarikko ta·raken parakataina National Testing Agency (NTA) u·iatangaha.
