Tikrikilla Block-ni ning·o donggipa Rabukong songo Eklavya Model Residential School-ko rikna March 6, 2019 bilsion pangchakani ro·ongko songe on·ani gisepon da·onaba rika cho·anirangko a·bachengatgija galchipe donenganina Civil Society A·chik Welfare Organisation (CSAWO) dolrang suk ong·gijaniko parakataha.
Ia skul nokko matchote on·genchimode jolo songdonge poraienggipa chatro chatrirangna namgipa poraianiko gadangko skie ra∙nagita cholrangko man·genchim ine CSAWO dol aganangaha. Unbaksana ia skulko ta·rake rike matchote on·jagenchimode kamko jako ra·enggipa contractor-ni kosako High Court-o PIL ka·angna CSAWO dolrang mikrakataniko on·ataha.
Ma·mong sorkarini A·chik a·songna kamrangko ka∙na chamatgimin tangka paisarangko cha·boke cha·enganiko a·dok sorkari nirokjaengani giminba CSAWO HQ. Ampati-ni President Tryans Ch. Marak Education Minister-o sing·doangaha.
