Re·baenggipa June 15 tariko Job Reservation Policy-ko Expert Committee-rangni nipiltaianiko dakna skang pilak bako ong·giparangni aganku·pattianirangko on·atchina u·iatanina A·chik jatna apsan cholko on·a aro chu·gimik tang·doanina mai dakgipa ja·kurangko de·na nangani bidingo Rongrongni MDC Rinaldo K. Sangma Expert Committee-ni Secretary L K. Diengdoh-na chitti seataha.
Meghalaya-ni Job Reservation Policy-ko a·dokni jat gittam chong·motan Khasi, Jaintia aro Garo jatrangna poraiani a·bao aro kamrangna rimnapanio darang jatkoba mikkang nitegija apsangrik ong·e suale gitcham dilgiparangni tik ka·gimin ong·a. Indake ong·engon kakketko namedake niatgenchimode Meghalaya a·dokko man·aoni da·onaba pilak namgnirangko jekai bidani a·bao ba kamna rimnapanirango bang·batgipa jatrangsa man·rongenga aro A·chik jatrangkode onne ra·e nirokatrongja ine Sangma janapataha. Apsan daken chengonin da·onaba galonako ba galchipako man·e A·chik jatrang poraia skianio aro chu·gimik tang·doanio namen ja·manchakaona sokrongenga ineba Sangma agandapangaha.
Directorate of Economics & Statistics, Govt. of Meghalaya-ni 2022 bilsio census ka·e a·dok sorkario kam ka·giparangko chane mesokatanigitade, Scheduled Tribe-ni chu·gimik sak 56790 oni sak 35031 (61.69%)-nigitade Khasi aro Jaintia jatrangan bata aro A·chik jatrangde sak 19874 (35%) mangmangsan ong·aia ine u·iatangaha. Ia janapatgimin sakkirangko nie sorkarini kamrango baditana A·chik jatrang ja·manchakenganiko u·inagita man·a ine Sangma janapataha. Unbaksana indake A·chik jatrangni ja·manchakenganiko nike Meghalaya High Court kamrangna rimnapanio roster systemko jakkalchina ge·etangaha. Meghalaya Job Reservation Policy-o Khasi Jaintia-na 40% aro Garo-rangna 40% ka·e suale on·aniara lekkaosa sea donga indiba kakketko niatode iako da·onaba ja·rikgijaniko sorkarini see rakkianio niknagita man·enga ine Sangma janapataha.
Shillong damsa skotong songjinma ong·e aro uni sepangjolni biaprang re·na dona rama jal·ang, poraia skianio, rika cho·anirango, bading chiwalanio, tourism-ni a·bao, jatni dakbewalo aro manderang namgipa gadango janggi tangna cholko man·enga. Iani gisepon A·chikrang ga·nanggijagipa biaprango ong·an baksana re·na donagita rama jal·angrang, rika cho·anirang aro chu·gimik tang·doanio ja·manchakenga ine aganaha.Indake ong·engon population ba mandeni jelbatako nie reservation policy-ko dingtangatna dabianirangko u·inagita man·e Expert Committee-rang nipiltaianiko dakgenchimode ba dingtangatode A·chik jatni gimiknigita ja·manchakaniko nigrike chu·gimik tang·doanina reservation quota-ko bariatna nanga jedakode A·chik jatni ja·manchakenganiko apsan ong·atnagita dakchakani ong·gen ine Sangma didiataha.
Reservation Policy-ni mongsonggipa miksonganiara Meghalaya a·dokni jat gittamna apsan ong·e chu·gimik tang·doatna tik ka·gimin ong·a jeon Indian Constitution provision-o Article 16 ni Clause (4) aro (4A) jinmako kamna rimnapanio sakantinan apsan cholko on·a nangani dongan baksana a·dokni ning·o ja·manchakbatgipa jatrangna a·kange donna nanga aro jat jelbatako nie a·kangani ong·ja ine tik ka·gimin niam donga.Ia kakketgipa obostarangko nigrike A·chik jatrangni gimiknigita ja·manchakaniko name u·ie ra·e gipin jatrang baksa apsan gadango ong·atna, 40% reservation-oniko 50 % ona tang·doatchina Rongrong-ni MDC Rinaldo K. Sangma Expert Committee-ni Secretary L. K. Diengdoh-na chitti see didiangaha.
