Khasi Students’ Union (KSU) dolrang Khasi-Jaintia na 50%, Garo rangna 40%, OBC na 5% aro Unreserved na 5% dake chamatchina State Reservation Policy ni bidingo Expert Committee na chitti seataha.
Apsan daken Khasi-Jaintia na 50% job reservation ko chamatchina KHNAM dolrangba Expert Committee na chitti see u·iatangaha. Policy ni Para 1 o pangchake, Khasi-Jaintia aro Garo rangni population ba mande jelbataniko nigrikesa ia reservation ko tikatchinaba KHNAM dolrang janapangaha. 2011 bilsini census ko niatgenchimode Khasi-Jaintia jatni mande jelaniara sak 9,49,756 mangni ong∙a jean Garo jatni 5,78,918 na bate name manchan bata ine KHNAM aganangaha.
Population o pangchake reservation ko chamatna man∙jagenchimode Khasi, Jaintia aro Garo jatgittamna chu∙gimik 80% ko chamatchina didiangskaaha. KHNAM ni agananigitade, 1972 bilsini 12 January ni Reservation Policy jean Para 2 o segatgipao je kamrangko jatsa na chamatgipako gapatna man∙gijagipaona mikkangchi rimnapna tarigimin niamko ra∙galskana nanga ine aganangaha.
28 May, 1972 ni office memorandum No. PER/222/72/163 o Garo rangna chamatgipa kamrangko a∙dokni apalni manderangba man∙a kra∙a ineba janapangan baksana a∙dokni manderang ia policy ni namgniko man∙agita ia dongimin niamko ja∙rikna on∙a nangnikgijanikoba uamang parakataha.
Una agreba 18 December, 1972 ni office memorandum No PER 272/72/5 o district ni gadango district post na reservation ko on∙anio jeon posting ka∙gimin biaponi gipin a∙jaona transfer ka∙na man∙ja ine segatgimin niamo pangchake Khasi-Jaintia aro Garo rangna 40% prak chamatgipako ra∙galskae jatgittam nan 80% ko on∙skana nanga ineba aganangaha. Iako aganengon Khasi-Jaintia na uamangni biap tango 80% ko aro Garo rangnaba A∙chik a∙songo 80% ko on∙skachina didiangaha.
