Da·al salni bako Tura Civil Hospital-o World Blood Donors Day ba an·tangtangni an·chiko on·chakgiparangni salko “20 years of celebrating giving: Thank you, blood donors” katta bichongko done Tura Civil Hospital-ni Blood Centre, State Blood Transfusion Council and State Blood Cell, National Health Mission bakrime manidilangaha.
Ia program-o a·jani DC Jagdish Chelani mongsonggipa sokgipa ong·e an·chi on·chakgiparangko mittelpile an·chi on·chakani gamchatani gimin aro an·chi on·chakanichi manderangni janggiko jokatna amaniko aganan baksana an·chi on·chakaniko dakchinagitaba didiangjolaha. A·dok sorkari sanna bannani a·bako namdapatna aro manderangko nambate nirok simsakna man·agita raken kamko ka·ani bidingoba DC aganangaha.
Apsan daken Tura Civil Hospital-ni Superintendent Dr. I C. Marak ia bilsini Theme-ni miksonganiara mandeni janggiko jokatna an·chi on·chakgipa manderangko mittelpilna aro mande ra·nagita ong·a ine talatangaha. Una agreba mandena an·chi on·aniko namdapatna an·chi on·chakram biaprangko nambate tarina kamrangko ka·angenga ineba Dr. Marak aganangaha.
