South Garo Hills, Rongara songni sima ari jolo Bangladesh-ona badingsrukatna miksonge nok te·sao donenggipa hajal 10 kg chinirangko 200 Bn BSF aro Meghalaya police dolrang bakrime am·sandianio rim·na man·aha. South Garo Hills aro Bangladesh sima ari jolrango chinirangko batanggimin somoirangonin rim·na man·enganiko nikna man·ronga. Iarangko da·ona kingkingba dontongatna man·kujaenga aro nirok simsakanio namgipa ja·kurangko de·na nangkuenga.
Songdongenggipa manderangni parakatanigitade hajal ni hajal kg chinirangko batanggimin salrango sima ari jolranggita bang·e salangaha ine u·ina man·angaha.
Apsandakgipa obosta East Khasi Hills, Meghalaya aro Bangladesh sima ari jolo ong·aha jeon 100 Bn BSF dolrangni am·sandianichi lakh 73 mang damni samrang aro mobile phone-ni display-rangko man·skaaha. BSF dolrang Khasimara chibimao adita manderangni re·jipjipaniko u·ina man·e bakan a·damona re·ange am·sandianiko dakon ia bosturangko man·aha. Indaken uamangni man·gimin bosturangko custom office-ona watataha ine koborko parakataha.
