Asanang Wangala hall-o chang 47 gipa Meghalaya State Fide Rated Chess Championship 2024 ko salgittamna ong·atanggipa da·alo name matchotangaha. Ia chess kal·susaaniko Meghalaya Chess Association (MCA) ni dakchakanichi Garo Hills Chess Association (GHCA) ong·atangaha. Kal·anio bakko ra·nagita a·dokni dingtang dingtang a·jani chess kal·giparang chu·gimik sak 84 mang re·bae susaangaha.
Meghalaya State Fide Rated Chess Championship 2024 ko South Garo Hills club-oni Silseng N. Marak, 1684 rating aro 7.5 point-rangko man·e skanggipa ong·angaha. Garo Hills Chess Association (GHCA) oni Silkam Sangma, 1822 rating aro 7 point ko man·e gnigipako man·angaha. Gittamgipako, 1738 rating aro 6 point-rangko man·gipa GHCA-ni Barbith M. Sangma man·angskaaha.
Me·chik bi·sa bilsi 10 ni ning·o kal·atanio Ansame Ch. Marak skanggipa biapko cheangaha aro bilsi 14 ni ning·o Aesara Ringmitelachi Ch. Momin skanggipako man·aha. Me·a bi·sa bilsi 14 ni ning·o kal·atanio Mayukh Sah skanggipako cheangaha aro Garo Hills-ni bilsi 18 ni ning·o kal·atgipako Arano Rikrim Ch. Momin cheangskaaha.
Dambebatgiparangko kal·atanio Eidenson Marwein ko Best Youngest Player-na seokangaha. Bilsi 50 rangni gisepo susagipako Silberth Ch. Marak skanggipa gadangko cheangaha.
Garo Hills-ni me·asa chadamberangna bilsi 18 batgiparangna kal·atanio Best Player-ko Tengrang R. Sangma man·angaha aro me·chik bi·sarangni Best Under 18 Garo Hills-ko Amaziah Gapesa Marak man·angskaaha. Meghalaya a·dok gimikna me·chik chadamberangni bilsi 18 batgiparangko kal·atanio Best Player-ko GHCA-ni Jacintha Ch. Marak man·angaha. Best Jaintia Hills-ko West Jaintia Hills-oni Zephaniah Dkhar man·angskaaha. Uandake Best Khasi Hills-ko Anubhav Sarma aro Best Unrated-ko Pynmaroi Suting man·angaha.
Ia kal·susaanio chu·gimik brigipa gadangona kingking chegiparang, re·baengipa National Chess Championship-o Meghalaya a·dokni palo bak ra·nagita cholko man·anggen ine GHCA ni General Secretary Tengrang Sangma aganangaha. Kal·susaanio bakko ra·nagita All India Chess Federation-o bimuntangko online se·gataniko dakna nangchongmota ineba Sangma agandapangaha.
