A·dok sorkarini Reservation Policy, 1972 bilsio jat gittamna jekon A·chik jatna 40 percent, Khasi-Jiantia-na 40 percent aro gipin jatrangna 20 percent-ko tikate tik ka·giminko dingtangatjachina Eastern Zone Williamnagar Garo Students’ Union (GSU) dolrang Expert Committee-ni Secretary L.K. Diengdoh-na chitti see didiataha.
Ru·uta bilsirangonin ia policy-ko ja·rikbae Meghalaya a·doko songdongenggipa mongsonggipa jat gittamna apsan ong·e kamrangna rimnapaniko dakbaenga. Iani gisepon da·o policy-ko nipiltaie A·chikrangna a·kanggimin 40 percent-ko dingtangatode chengo dilgiparangni tik ka·giminko pe·ani ong·gen.
Policy-ko dingtangatgija ja·rikangkuanichi a·dokni jatrangna apsan ong·e chu·gimik tang·doaniko ra·bana aro pilak jatrangko mikkang nitea gri cholko on·angkuna dakchakani ong·gen ineba Eastern Zone GSU dolrang janapataha.
