Batanggimin antirango jimbee mikka waanichi Selsella jolrango chi bana ong·e neng·nikanirangko chagrongenganina jolni NGO-rang jekai ASWA, FKJGP, GSU aro ADE dolrang songdongenggipa manderangni palo ta·rakkale nirokatchina Chief Minister Conrad Sangma-na chitti see u·iatangaha.
Indake anti gimiko mikka jimbee waanichi rama jal·angrang nosto ong·e salantio re·ruraanio neng·nikanirangko chagrongenga aro game cha·giparangni ge·a gamanirangko nisiate janggi tanganio neng·nikanikoba man·enga ine janapataha. Unbaksana skul re·gipa bi·sarangba re·na dona man·jae skul re·aniko dontongatna nangao ga·akenga ineba janapataha.
A·dok sorkari aro District Administration indakgipa obostarango chagrongenggipa biaprangko nirokate manderangni neng·nikaniko olgrokatna dakchakaniko on·china NGO dolrang mol·molataha. Una agreba ia wachi karini somoirango chi bana ong·ronggipa biaprangona National Disaster Response Force (NDRF) dolrangko watate dakchakaniko on·a man·agita aro mikkangchi manderangni janggirangko naljokatna tarisamsochinaba Selsella-ni bakrimgimin NGO dolrang didiataha.
