Ia bilsini SSLC porikkako topper-ni gadango chu·sokgipa saksa chadambe Lilian Christiano B. Marak aro Chokpot-ni ning·o ong·gipa skulrangni SSLC aro HSSLC porikkao 1st division-ko man·gipa chatro chatrirangna, Garo Students’ Union Chokpot Regional Unit-rang uamangni nambee chu·sokanina mittelpilaniko dakangaha.
Ia program-ona Chokpot-ni MLA Sengchim Sangma mongsonggipa ong·e sokbae chatro chatrirangna mikkangchi nama gadangrango chu·sokgipa ong·na jotton ka·china didiangaha. Unbaksana Lilian-ni nambegipa gadango chu·soke Chokpot-na rasongko ra·baanina mittelpilan baksana uni nambee chu·sokanichi Chokpot-ni gipin chatro chatrirangna namgipa dakmesokani ong·anggen ine GSU Chokpot Regional Unit-ni Additional Secretary Nangrimwell Sangma aganangaha.
Lilian-na agreba Chokpot-ni bang·a chatro chatrirang SSLC aro HSSLC porikkarango nambegipa mark-rangko man·e 1st division-o chu·soke skultangtangna namgipa bimungko ra·baaha. Indake chatro chatrirangni nambee chu·sokanina mittelan baksana mikkangchi uamangni chubata gadango poraianioba name chu·sokangchina GSU Chokpot Regional Unit dolrang nama skaniko on·angaha.
