Garo Hills-ni adita a·jarango re·anggipa salrangoni mikka balwa rake kimpretanichi nosto ong·atako man·angaha aro manderangna neng·nikanikoba ra·baaha.
WGH, Selsella-o damgittam songrang da·al pringni somoionin chi dubina a·bachenge nok jamrang nosto ong·gipa nokdangrangko sorkarini nokrangona naljokatnagita apjitataha. Uamangko sorkarini skul aro community hall-rango dongchakatenga aro obostarang namkuja dipet re·angkujachina WGH Deputy Commissioner, Jagdish Chelani u·iatangaha.
Tura songjinmaoba adita a·a ruronganirang donggenchimoba bang·e nisiataniko ra·bajaha ine DC agandapangaha. Remal cyclone-ni ja·mano ian apsandaken bilakbegipa mikka balwaan ong·a jean da·al pring 4 oni Tura songjinmao kontasa mangna ru·ute ong·angaha ine DC janapataha.
North Garo Hills-o, Resu-oni Mendi re·gipa ramao dolong tarigipao chi bana ong·e neng·nikaniko man·angskaaha. Ia chi skonge donggipao Bolero Pick up gari bolsa a·sel ong·aha jekon kobor man·soanigitade manderang saknaaoni naljokna man·aha ine u·iataha.
Apsandaken SGH Baghmara-china jokanggipa Simsang chibimakoba mijal salna baten dal·bataha ine parakataha. Da·o dipet janggirang gimaani koborrang dongkujaenga.
Williamnagar songjinmaoba Kusimkolgre Baptist gilja nokchina re·gipa ramao chirang jokprake donganiko nikangaha. Uandake dingtang dingtang a·kawe jolrango jekai Garobadha antidamoba chu·ongagita nalarang dongjae chirang skonge donganiko nikangaha.
Re·anggipa salrango, SGH Karukol-o mikka jimbeanichi ramao chi jokprake dongani a·selo Tura, Shillong re·gipa gari gorarang aro songni manderang re·rurana neng·nikaniko man·angaha.
Ia mikka balwa rakaniko IMD salbongana ong·na niksamsoe parakataha jean Garo Hills-o u·iatsoagita mikka jimbeani, balwa rakaniko aro kimpretaniko nikangna man·enga.
