West Garo Hills Rongsaigre jolo batanggimin adita jarangonin ringani chirangko tik ong·e sokatjae songdongenggipa manderang neng·nikaniko chagrongenganina Western Zonal Phulbari A·chik Progressive Approach (APA) dolrang Phulbari PHE-ni SDO-na chitti see u·iatangaha.
Ringani chirangko wata tik ong·jaengani a·selo bang·a changon songdongenggipa manderangni gisepo nanggrikanirang sokrongenga aro ian jolo mongsonggipa neng·nikani ong·enga ine APA dol janapataha.
Indakgipa obostako chagrongenganina songdongenggipa manderangni neng·nikanirangko olgrokatna man·agita iani bidingo nanggipa ja·kurangko de·e ta·rake nirokatchinagita daito donggipa officer-rangko Phulbari-ni APA dolrang didiataha.
