A·doko manderangni bading chiwalanirangko tang·doatnagita Meghalaya Industrial Development Corporation Ltd. (MIDC), Business Facilitation Centre (BFC) rangko bikote on·angaha. Ia BFC rangko dingtang mancha entrepreneur rangko aro manderangni janggi tanganiko tang·doatna dakchakaniko on·a miksonge MIDC ra·baaha.
BFC rangko a·bachengatanichi MIDC ni chalaienggipa karkanarang jean Byrnihat, Umian aro Mendipathar rango dolgnini gisepo a·a chiani bidingo songgigrikanirangko nirokaniko dakanggen. Ia a·bao bading chiwalaniko maming neng·nikani donggija name dakna MIDC oni kamrangko somoigita nirokanggen.
CM-ELEVATE na dorgastoko galatenggiparang BFC ni Credit Information Bureau (India) Limited (CIBIL) score report rango namgniko man·a am·gen. Iako dakanichi tangka paisani bidingo nambate dakna aro loan rangko ta·rake sokatna dakchakaniko on·anggen. BFC nigita Financial Literacy and Education capacity building program-rangko ong·atanichi entrepreneur rangna tangka paisarangko nama bewalo jakkalna aro bakroe chanchie business rangko dakna u·ianikoba pakwatgen.
MIDC ni Chairman, James P K Sangma, BFC rangko ra·baanichi iani a·bao name dangdike on·angna skaniko janapate, Meghalaya ni entrepreneur rangko ra·dona ian MIDC ni namgipa ja·ku de·aniko mesoka ine parakataha. Iarangko ra·baanichi entrepreneur rangna pangchakaniko on·an baksana Meghalaya a·doko bading chiwale cha·aniko tang·doatna dakchakaniba ong·gen ine Sangma agandapangaha.
