Adokgre Regional Unit-ni AHAM dolrang Adokgre-Mangsang-ona re·gipa Ildek chibimako RCC dolong kabate on·china Chief Minister Conrad Sangma-na chittiko sedoataha. Ia Ildek A·kong-ni RCC dolongko tarinagita 2017 bilsion gong Crore 12,29,89,071 chamatgimin tangkarangko sorkarini dontongatanichi songdongenggipa manderangna namen jajrenganirang ong·enga ine janapataha.
Ildek chibimao RCC dolongko tariani palo culvert-ko maming pangchakani donggija niamgita tarijani a·selo chirangni tang·doanichi man·pakangaha ine AHAM dol matnangataha. Chirangni ditdoanichi sepango donggipa a·palrangona aro gue baganrangona jokange mittam a·arangko chi man·pakangaha ine uamang parakataha. Ian sorkarini ge·e game cha·enggiparangna simsakgijaniko mesoka jekon Article 14 constitution aro Article 21 o pangchake nosto ong·atako man·gipa a·a nokgiparangna on·pilskaaniko dakchinaba AHAM janapangaha.
AHAM dolrang battanggimin salrango adita memorandum-rangko on·ahaoba sorkarioniko mamingkoba aganchakaniko man·jaha ine chittio janapataha. Salantio re·ruraenggipa, chatro chatrirang aro jolo songdongenggiparangni neng·nikanirangko nirokate Ildek Akong-o RCC dolongko tarie on·chinagita AHAM dolrang sorkario mol·molangaha.
