South West Garo Hills, Ampati-o World Day Against Human Trafficking ko maniani bakgita a·jani District Administration dingtang mancha National Commission for Protection of Child Rights (NCPCR) aro Meghalaya State Commission for Protection of Child Rights (MSCPCR) baksa bakrime “Prevention and Combating Child Trafficking 2.0 in 100 Bordering and Adjoining Districts of India” katta bichongo pangchake workshop-ko Multi Facility Centre, Ampati o ong·atangaha. Ia campaign ko June 1 oni July 30 tarikona ka·anggen jean manderangna mikrakataniko ra·bana aro bi·sarangni kosako ong·gija dakanirangko dontongatna jotton ka·ani ong·a.
Workshop ona bang·a gadango kam ka·enggiparang sokbatokaha, jeon Law Enforcement, Child Protection agencies, line department, songsalko dilgiparang aro song-nokni manderang bakko ra·angtokaha. South West Garo Hills ni Additional Deputy Commissioner Raymond Z D Shira, MCS, ia program-ko ong·atani gamchataniko janape SWGH a·ja Assam aro Bangladesh a·song baksa sima ari sepangani gimin bi·sarangko badingani bidingo dingtang dingtang gadangni manderang baksa agangolpogrikna nanganiko parakangaha.
Bi·sarangko badingsrukaniko champengna gita police department o Anti Human Trafficking unit rangko donaha aro a·seloniko ta·rake naljokatna Special Anti-Human Trafficking garikoba on·e ia kamrangko dontongatna jotton ka·enga ine Shira aganangaha. Shira, bon·kame manderangko ku·monge ia namgijagipa kamko dontongatna ku·cholsan ong·e kam ka·chinaba mol·molangaha.
