Da·al pringni bako South Central Railway (SCR) skotong office-ni sambao donggipa Mettuguda-ni washing line-o neng·takate dongipa rel garini damgni kutturirangko wa·al kamaha. Bang·bata rel garirangkon Secundrabad railway station-ona sokatna skang SCR-ni office Mettugada-ni susranggipa line o rongtale neng·takate don·ani ja·mano songreani somoi ong·joko ra·angronga.
A·sel ong·a biapona wa·alko kimitgipa dolrang taraken sokangahaoba sam bolrangni changroani a·selo wa·alko kamchakgipa biapona jang·kerangko jakkale kimitnagita jotton ka·angaha. Wa·al kamchakenggipa biaponi chadoenggipa wal·kurang ong·katanichi neng·nikaniko man·genchimoba wa·alko kimitna raken jotton ka·e gipin kutturirangona kamanganiko champengna man·aha.
Railway-o kam ka·giparang wa·al kamani a·selrangko name ma·sina man·kujaenganina ong·anggimin ja·pangko am·sandianiko dakna department-ni official-rang u·iatangaha. A·selo darangba saknaa man·jaha aro janggirang naljokaha ine koborna parakataha.
