Reservation Policy ni bidingo Hynniewtrep Achik National Movement (HANM) dolrang Garo, Khasi aro Jaintia jatrangna 80% ko on·a nanga ine Expert Committee na batanggimin salrango ku·pattianiko ma·sisretani bidingo talataniko on·ataha. HANM dolni talatanigitade uamang 80% ko aganengon Garorangna 40%, Khasi aro Jaintia rangna 40% ko on·anikosa miksonga ine media-na aro manderangni jajaaniko gimaatna parakataha.
Batanggimin chango, HANM ni Assistant Secretary, Riwan Sohtun, Reservation Policy ko merit ba man·a krabatgipao pangchakesa on·a nanga ine aganangaha. Porikkao Khasirang nambate dakode uamang man·china aro Garorang nambatode kamko Garorangna on·a nanga ine koborrango parakataha. Unbaksana, songsalni kangalbatsranggipa chadamberangnaba kamrangko tikatna niamrangko tarina nanga ine uamang agandapangaha.
Media aro manderangni gisepo ia jajaanirang ong·kate uamangko sing·doanina, Garorangna 40% ko, Khasi aro Jaintia na 40% ko on·a nanga ine HANM talataniko dakatskaaha.
