Tura Football League 2024 ni skanggipa Division o da·al salni kal·anio Rongkhon Sporting Club goal 4-0 chi Araimile SCC dolko altuae amataha. Rongkhon Sporting Club dolna goal 4 gimikkon Andrew Sangma chipe on·angaha. Ua skanggipa half o goal 2 aro gnigipa half o goal 2 ko chipdapaha. Ia goal-rangko chipna ua doltangni mid-field o kal·giparangoniko namen dakchakaniko man·e da·alni susaanio nambate kal·gipa ong·aha.
Araimile SCC inditana kal·anio marape dakna man·jae goal-rangko chipna man·jaha aro cholrangko man·e jotton ka·oba Rongkhon SC ni jakchi sirikaona sokaha.
Division II ni gisepo da·alni kal·anio, Ringre Gittim Youth Club goal 3-0 chi Dilneng Sports Club dolko amatskaaha. Apsandaken uamangni kal·anioba Jobitson Sangma saksan doltangna goal 3 ko chipe cheataha. Uandake, da·alni changgni kal·anion hat-trick chipako nikangna man·aha.
