South West Garo Hills, Ampati Government Higher Secondary School-o District Police aro Education Official-rang bakrime bilsi chu·onggija gari gora salgipa chadamberang ba school bi·sarangko champengnagita awareness program-ko ong·atangaha.
Ia program-ona a·jani SP, IPS Vikas Kumar, Deputy SP, MPS Ravi Sangma aro Education Department-ni dolrang bakko ra·e bilsi chu·onggijagipa chadamberangni gari gora salaniara niamni apalo ong·aniko ma·apa aro jolni manderangna agantalate on·angaha. Apsan dake uamangna gari gorarangko salna on·genchimode Section 199A Motor Vehicle (AV) Amendment Act, 2019 niamo pangchake gari nokgipa ba ma·apako bilsi gittam na pattoko donan baksa hajal 25 daiko gamna nanga ine u·iatangaha.
Ia program-ko a·jani gipin school-rangoba dakangani ja·mano nanga ja·kurangko de·e niamko jarikgijagiparangni kosako rakka ja·kuko de·angen ine SP Kumar aganangaha. Iako ong·atani miksonganiara bi·sarangni gisepo a·sel ong·aniko naljoke rakkina aro namgipa niamrangko jakkale gari gorako salaniko skul bi·sarangna skie mikrakaniko on·a ong·atenga. Unigimin pilak ma·aparangko niamko jakrike pilak a·selrangoni naljoke dongna bakrime kamko ka·na didiangaha.
