Meghalaya ni adita chatro chatrirangni NEET-UG porikkako setaina National Testing Agency (NTA) o janapataniko Supreme Court ra·chake anti gnini gisepo aganchakaniko on·atchina ge·etataha. NEET-UG porikkako re·anggipa May 5 tariko seangaha jeon bang·a Meghalaya ni chatro chatrirang minute 40-45 mangna somoiorangko gimaate neng·nikaniko chagrongangaha
NTA ni kosako Supreme Court ona ra·doanggipa meghalaya-ni bakrimgipa chatro chatrirang chu·gimik sak 1563 mang gnang. Ia sak 1563 chatro chatrirangna re·anggipa antio uamangni gimagimin somoirangna grace mark on·dapna am·gipakoba dontongataha. Da·o ia chatro chatrirang iarangko chagrongani a·sel gitaldake NEET-UG porikkako setaina dabiangskaenga.
